Trupat e dy ushtarëve gjermanë të Luftës së Dytë Botërore janë gjetur në lumin Danub në Budapest, për shkak të nivelit rekord të ulët të ujit pas një thatësire të fortë.
Pranë mbetjeve të tyre u gjetën edhe shenjat identifikuese të dy ushtarëve, një motoçikletë e ushtrisë gjermane Wehrmacht, pothuajse e paprekur, një unazë martese dhe një mburojë Kuban – një dekoratë luftarake e Wehrmacht-it, bëri të ditur Komisioni Gjerman për Varrezat e Luftës.
Këto zbulime të jashtëzakonshme kanë ngjallur shpresën se disa familje mund të mësojnë më në fund fatin e të afërmve të tyre, më shumë se 80 vjet pas luftës.
“Tani fillon një enigmë, në të cilën do të përpiqemi të përcaktojmë identitetin e dy të vdekurve”, tha Arne Schrader, nga Komisioni Gjerman për Varrezat e Luftës, për gazetën gjermane Bild.
Rrënojat në Danub u zbuluan më 2 gusht, kur një kalimtar raportoi se një pjesë e motoçikletës po dilte mes shkëmbinjve në bregun e lumit, në qendër të Budapestit.
Ekipi gjeti gjithashtu mina antitank, duke bërë që bregu i lumit të mbyllej përkohësisht, ndërsa në vend u dërgua një njësi për çaktivizimin e bombave.
Disa prej sendeve të gjetura në lumë, veçanërisht shenjat identifikuese dhe motoçikleta, janë ruajtur në mënyrë të jashtëzakonshme falë përzierjes së llumit të portit dhe vajit që ndodhej në shtratin e lumit, sipas Komisionit Gjerman për Varrezat e Luftës.
Komisioni është një organizatë jofitimprurëse gjermane që kërkon, nxjerr dhe varros të rënët e luftës në emër të qeverisë gjermane. /skyweb.al
