Meta Platforms përballet nga e mërkura me një gjyq federal në Kaliforni, ku akuzohet se ka projektuar Facebook dhe Instagram për t’i bërë fëmijët dhe adoleshentët të varur nga platformat, sipas Retuters.
Padia, e ngritur nga Colorado, Kentucky, California dhe New Jersey, pretendon se Meta i ka dizajnuar platformat për të mbajtur përdoruesit e rinj sa më gjatë online dhe se ka mashtruar publikun për rreziqet ndaj fëmijëve. Në çështje përfshihen edhe 29 shtete, të cilat e akuzojnë kompaninë për mbledhje dhe përdorim të paligjshëm të të dhënave të fëmijëve.
Gjyqi pritet të zgjasë rreth shtatë javë. Mark Zuckerberg dhe drejtuesi i Instagram-it, Adam Mosseri, pritet të dëshmojnë. Shtetet po kërkojnë gjithashtu që Meta të vendosë kufizime moshe, të heqë funksionin e lëvizjes pa fund të përmbajtjes dhe të ndërmarrë masa të tjera për mbrojtjen e të miturve.
Meta i ka kundërshtuar akuzat dhe thotë se provat do të tregojnë përpjekjet e saj për të mbështetur dhe mbrojtur të rinjtë. Kompania ka paralajmëruar se dëmet financiare të mundshme mund të arrijnë deri në 1.4 trilionë dollarë.
Çështja vjen në një kohë kur kompanitë e mediave sociale po përballen me mijëra padi për ndikimin e platformave të tyre te fëmijët. Vetëm javën e kaluar, një gjykatë në New Mexico urdhëroi Meta-n të paguante 567 milionë dollarë dhe të ndryshonte disa praktika, pasi e gjeti përgjegjëse për dëmtimin e shëndetit mendor të fëmijëve. /skyweb.al
