Operatori i Sistemit të Shpërndarjes duhet të përmirësojë mënyrën e informimit të qytetarëve për ndërprerjet e energjisë elektrike, duke i publikuar njoftimet në kohë reale në kanalet zyrtare.
Kërkesa është bërë nga Enti Rregullator i Energjisë në vlerësimin e raportit vjetor të pajtueshmërisë së OSSH-së për vitin 2025, të publikuar në Fletoren Zyrtare.
ERE kërkon që faqja zyrtare e internetit e OSSH-së të rifreskohet në të njëjtën kohë me aplikacionin e kompanisë, në mënyrë që konsumatorët të marrin informacion të përditësuar për shkëputjet e energjisë elektrike dhe problematika të tjera në rrjet.
Rregullatori kërkon gjithashtu që në faqen e OSSH-së të mbahen të përditësuara dhe lehtësisht të aksesueshme edhe aktet rregullatore që lidhen me aktivitetin e operatorit.
Rekomandimi vjen në kuadër të masave që ERE ka kërkuar për rritjen e transparencës dhe përmirësimin e komunikimit me përdoruesit e rrjetit.
Në të njëjtin raport, ERE ka evidentuar edhe raste të tejkalimit të afateve procedurale në trajtimin e ankesave të qytetarëve dhe ka kërkuar që në raportimin e ardhshëm të jepen të dhëna të qarta për numrin e rasteve, arsyet e vonesave dhe masat e marra. /skyweb.al
