Shqipëria pritet të krijojë një panoramë më të qartë të infrastrukturës së karikimit të automjeteve elektrike, ndërsa ERE i ka kërkuar OSSH-së të evidentojë numrin dhe shpërndarjen e pikave të karikimit në vend.
Në rekomandimet për periudhën pasardhëse, Enti Rregullator i Energjisë kërkon që të identifikohen veçmas pikat private të karikimit, të vendosura në banesa apo ambiente biznesi për përdorim individual, dhe pikat publike, të aksesueshme nga të gjithë përdoruesit e automjeteve elektrike.
Të dhënat duhet të ndahen edhe sipas rajoneve, duke dhënë për herë të parë një pasqyrë më të plotë se ku është përqendruar infrastruktura e karikimit në Shqipëri.
ERE kërkon gjithashtu që të llogaritet konsumi total vjetor i energjisë elektrike nga këto pika, si dhe pesha që ai zë në konsumin e përgjithshëm.
Rregullatori argumenton se pikat e karikimit të automjeteve elektrike janë bërë vitet e fundit një element gjithnjë e më i rëndësishëm i transportit dhe kërkojnë zgjerim të infrastrukturës përkatëse.
Mbledhja e këtyre të dhënave do t’i japë OSSH-së dhe ERE-s një bazë më të saktë për të vlerësuar ndikimin që shtimi i makinave elektrike do të ketë mbi rrjetin e shpërndarjes dhe nevojën për investime të reja.
