Carlos Koo nga Hong Kongu nisi të merrej me gdhendjen në metal pothuajse rastësisht. Sot, ai punon mbi ora luksoze që kërkojnë qindra orë punë dhe merr porosi nga klientë në Dubai, SHBA, Britani dhe Gjermani.
Gjithçka nisi kur Koo, aktor dhe model, donte të personalizonte motorin e tij Harley Davidson me një gdhendje të veçantë. Pasi nuk gjeti mjeshtrin që kërkonte, vendosi ta mësonte vetë këtë art.
Në vitin 2018 udhëtoi në Bali për të parë nga afër punën e një artisti të gdhendjes në metal. Aty mësoi bazat e përdorimit të çekiçit dhe daltës.
Më pas erdhi pandemia. Gjatë izolimit, Koo kalonte orë të tëra duke parë video në YouTube dhe duke praktikuar çdo ditë.
Pasi fitoi siguri me metalin, vendosi të provonte diçka shumë më të vështirë: gdhendjen e orëve.
Ndryshe nga punishtet moderne që përdorin lazer, ai punon tërësisht me dorë. Çdo goditje e daltës është përfundimtare, pasi në sipërfaqen e një ore nuk ka pothuajse fare hapësirë për gabime.
Një punim i vetëm mund t’i marrë rreth 200 orë, ndërsa për disa modele Koo ka shpenzuar deri në 400 orë punë.
Fillimisht gdhendi një Omega Seamaster të tijën, por puna nuk i solli menjëherë klientë. Edhe pse kishte investuar rreth 11 mijë euro në vegla, për një moment mendoi të hiqte dorë.
Kthesa erdhi kur punoi mbi një IWC Big Pilot, duke gdhendur një hartë, diellin, hënën dhe yjet mbi orë.
Punimi tërhoqi vëmendjen e koleksionistëve dhe, sipas Tatler Asia, porositë nisën të vinin nga vende të ndryshme të botës.
Në vitin 2023 ai arriti edhe një bashkëpunim me prodhuesin zviceran të orëve luksoze Franck Muller, për të cilin realizoi dy ora tavoline.
Sot Koo njihet me emrin CK Engraving dhe e ka kthyer një aftësi që nisi ta mësonte përmes videove në internet në një profesion të specializuar, ku çdo orë trajtohet si një vepër arti.
