Përdorimi i antibiotikëve në ferma pritet të kalojë nën rregulla shumë më të rrepta, me synimin për të frenuar rezistencën ndaj antimikrobikëve dhe për të rritur sigurinë ushqimore.
Projektligji i ri “Për produktet mjekësore veterinare” ndalon përdorimin e vazhdueshëm të këtyre barnave te kafshët.
Antibiotikët nuk do të mund të përdoren për të kompensuar mungesën e higjienës, kushtet e këqija të mbarështimit apo dobësitë në menaxhimin e fermës.
Përdorimi parandalues do të lejohet vetëm në raste të jashtëzakonshme dhe, kryesisht, për kafshë të veçanta kur rreziku i infeksionit është shumë i lartë.
Edhe trajtimi i një grupi kafshësh do të lejohet vetëm kur sëmundja është konstatuar në një pjesë të tufës, rreziku i përhapjes është i madh dhe nuk ekzistojnë alternativa të tjera.
Një nga ndryshimet kryesore lidhet me recetat veterinare për produktet antimikrobike.
Sipas projektligjit, receta do të jetë e vlefshme për jo më shumë se pesë ditë nga data e lëshimit.
Masa synon të kufizojë blerjen dhe përdorimin e pakontrolluar të antibiotikëve në sektorin blegtoral.
Autoritetet do të mbledhin gjithashtu të dhëna për sasitë e shitura dhe përdorimin real të antimikrobikëve sipas llojit të kafshës.
Parashikohet edhe hartimi i një plani kombëtar për kontrollin e rezistencës ndaj këtyre barnave, sipas standardeve të Bashkimit Europian.
Një pjesë e antibiotikëve që konsiderohen kritikë për mjekësinë njerëzore mund të rezervohen vetëm për trajtimin e njerëzve dhe të mos përdoren në sektorin veterinar.
Qëllimi është që bakteret të mos bëhen rezistente për shkak të përdorimit të tepërt ose të panevojshëm të barnave në ferma.
Kufizimet lidhen drejtpërdrejt edhe me mbrojtjen e konsumatorëve, pasi përdorimi i produkteve veterinare te kafshët që prodhojnë ushqim do të shoqërohet me kontrolle dhe periudha të detyrueshme pritjeje. /skyweb.al
