Qytetarët që kanë përfituar vendim për kalimin në pronësi të shtëpive të vjetra të ndërtuara para vitit 1991, oborreve në përdorim apo trojeve funksionale, mund të kryejnë regjistrimin e pronës përmes portalit e-Albania.
Agjencia Shtetërore e Kadastrës ka publikuar hapat që duhet të ndiqen për përfundimin e kësaj procedure, e cila u mundëson qytetarëve të pajisen me dokumentacionin e plotë të pronësisë.
Për të nisur aplikimin, qytetari duhet fillimisht të hyjë në llogarinë e tij në portalin e-Albania dhe të zgjedhë shërbimin “Aplikim për regjistrimin e kalimit të pronësisë me anë të ligjit, me vendim të gjykatës, apo të një akti administrativ”.
Pas zgjedhjes së këtij shërbimi dhe klikimit të opsionit “Përdor”, aplikanti duhet të krijojë një aplikim të ri dhe të plotësojë të dhënat e kërkuara nga sistemi.
Më pas duhet të shtojë nënshërbimin “Regjistrim i kalimit të pronësisë me anë të aktit administrativ të lëshuar nga ASHK”.
Sipas Kadastrës, në këtë fazë sistemi shton automatikisht edhe shërbimet për lëshimin e certifikatës së pronësisë, kopjes së kartelës së pasurisë së paluajtshme dhe kopjes së fragmentit të hartës kadastrale.
Pasi të jenë plotësuar të gjitha të dhënat, aplikimi duhet të dërgohet, ndërsa qytetari duhet të shkarkojë mandatin dhe të kryejë pagesën përkatëse.
Pagesa mund të bëhet online, pranë zyrave të Postës Shqiptare ose në bankat e nivelit të dytë.
Agjencia Shtetërore e Kadastrës bën të ditur gjithashtu se informacioni mbi dokumentacionin që kërkohet për secilin shërbim kadastral mund të gjendet në faqen e saj zyrtare, në rubrikën “Shërbime”. /skyweb.al
