Ari dhe argjendi kanë shënuar rritje të fortë gjatë gushtit, të mbështetur nga dobësimi i dollarit, rritja e borxhit të qeverisë amerikane dhe pritshmëritë më të ulëta për një tjetër rritje të normave të interesit nga Rezerva Federale.
Metalet e çmuara janë kthyer kështu në një nga investimet më të spikatura të muajit, duke rikuperuar një pjesë të humbjeve të forta të regjistruara më herët gjatë vitit.
Ari arriti një rekord historik prej 5,598 dollarësh për ons më 28 janar, por më pas ra deri në rreth 3,942 dollarë në fund të qershorit, ose afro 30% nën kulmin e tij.
Që prej asaj kohe çmimi është rikuperuar, me pjesën më të madhe të rritjes të përqendruar gjatë gushtit. Aktualisht ari tregtohet rreth 4,466 dollarë për ons, duke fituar rreth 11% vetëm këtë muaj dhe 3.6% që nga fillimi i vitit.
Edhe më e fortë ka qenë lëvizja e argjendit. Pas rekordit prej 121.65 dollarësh për ons më 29 janar, metali ra deri në rreth 54.7 dollarë në mesin e korrikut, një rënie prej afro 55%.
Që atëherë argjendi është rikuperuar me rreth 20% dhe aktualisht tregtohet pranë 66 dollarëve për ons. Vetëm gjatë gushtit është rritur rreth 16.5%, megjithëse mbetet ende mbi 7% më poshtë krahasuar me fillimin e vitit.
Rritja e fundit mori hov pasi Departamenti amerikan i Thesarit njoftoi se do të dyfishojë madhësinë e riblerjeve të obligacioneve me maturim 10 deri në 30 vjet, në të paktën 4 miliardë dollarë për operacion, duke nisur nga 9 shtatori.
Vendimi erdhi në një kohë kur borxhi kombëtar i SHBA-së kaloi për herë të parë 40 trilionë dollarë, rreth dy vjet më herët nga sa kishte parashikuar Zyra e Buxhetit e Kongresit.
Yield-i i obligacioneve 30-vjeçare amerikane kishte arritur ndërkohë nivelin më të lartë që prej vitit 2007, ndërsa dollari u dobësua pas njoftimit të Thesarit.
Kjo ka rikthyer shqetësimet se rritja e vazhdueshme e borxhit amerikan mund të dëmtojë gradualisht besimin te dollari dhe të shtyjë investitorët drejt aktiveve të konsideruara më të sigurta, si ari dhe argjendi.
Të dhënat më të dobëta për punësimin dhe shitjet me pakicë në SHBA, së bashku me zbutjen e inflacionit, kanë ulur gjithashtu pritshmëritë për një rritje të normave nga Fed në shtator. Sipas CME FedWatch, probabiliteti ka rënë nga mbi 50% në rreth një të tretën.
Normat më të ulëta të interesit favorizojnë zakonisht metalet e çmuara, pasi ulin avantazhin e aktiveve që ofrojnë interes. Ndërkohë, bankat qendrore dhe fondet ETF kanë vijuar të shtojnë ekspozimin ndaj arit, sipas të dhënave të World Gold Council. /skyweb.al
