Tirana është renditur si destinacioni më ekonomik në Europë për turistët që planifikikojnë pushime gjatë muajit shtator, me një kosto mesatare prej 59 eurosh në ditë për person.
Renditja është publikuar nga Euronews, bazuar në një analizë të kompanisë britanike të udhëtimeve “Thomas Cook” për më shumë se 50 destinacione europiane.
Në përllogaritje janë përfshirë çmimi mesatar i një nate në hotel me tre yje, një vakt në një restorant ekonomik, një kafe, transporti publik ditor dhe biletat për atraksionet turistike.
Sipas analizës, një natë në një hotel me tre yje në Tiranë kushton mesatarisht 32 euro për person. Një vakt në një restorant ekonomik përllogaritet në 8.50 euro, ndërsa një birrë vendase kushton rreth 1.50 euro.
Në vendin e dytë renditet Bukureshti, me një kosto ditore prej 66 eurosh për person. Antalia dhe Varshava ndajnë vendin e tretë, me nga 78 euro, ndërsa Stambolli renditet i pesti me 82 euro në ditë.
Lista vijon me Muğla-n dhe Krakovin, me nga 87 euro, Vilnius-in dhe Frankfurtin me nga 90 euro, si dhe Lionin me 91 euro. Tallini kushton mesatarisht 93 euro në ditë, Heraklioni 99 euro dhe Porto 100 euro.
Sipas drejtuesit të paketave dinamike në “Thomas Cook”, Nicholas Smith, qytetet e Europës Lindore dhe destinacionet turke vijojnë të ofrojnë çmime më të përballueshme. Megjithatë, rritja e numrit të vizitorëve pritet t’i bëjë këto destinacione gjithnjë e më të njohura dhe të kërkuara. /skyweb.al
