Çmimet e prodhimit në Shqipëri vijojnë të qëndrojnë në nivele shumë më të larta krahasuar me vitin 2021, ndërsa industria ushqimore po përballet me një tjetër rritje.
Sipas INSTAT, Indeksi i Çmimeve të Prodhimit arriti në 129.9 pikë gjatë tremujorit të dytë të vitit 2026. Kjo do të thotë se çmimet e produkteve që dalin nga fabrikat janë rreth 29.9% më të larta se në vitin 2021.
Krahasuar me tremujorin e dytë të vitit të kaluar, indeksi i përgjithshëm u rrit me vetëm 0.1%. Megjithatë, pas mesatares së ulët fshihen rritje më të forta në disa industri të lidhura drejtpërdrejt me konsumin.
Përpunimi i produkteve ushqimore regjistroi një rritje vjetore të çmimeve me 1.5%. Me të njëjtën normë u shtrenjtuan edhe produktet e kauçukut dhe plastikës.
Në tërësi, industria përpunuese shënoi një rritje prej 0.4%. Po kaq u rritën çmimet në furnizimin me ujë dhe aktivitetet e trajtimit e menaxhimit të mbetjeve.
Në kahun tjetër, çmimet e energjisë elektrike, gazit dhe avullit u ulën me 0.6%. Metalurgjia dhe prodhimi i pajisjeve elektrike shënuan rënie me nga 0.7%, ndërsa industria nxjerrëse u ul me 0.2%.
Të dhënat tregojnë gjithashtu se prodhuesit i rritën çmimet me 0.3% për tregun vendas, ndërsa për produktet e eksportuara i ulën me 0.3%. Pra, fabrikat po shesin më shtrenjtë brenda Shqipërisë, por më lirë në tregjet e huaja.
Rritja me 1.5% e çmimeve në industrinë ushqimore mund të reflektohet gradualisht edhe në çmimet e shitjes me pakicë, ndërsa niveli i përgjithshëm i çmimeve të prodhimit mbetet gati 30% mbi vitin 2021. /skyweb.al
