Organizata SCiDEV dhe rrjeti rajonal SafeJournalists kanë shprehur shqetësim të thellë për disa prej ndryshimeve të propozuara në draftin e ri të Kodit Penal, të cilat, sipas tyre, përbëjnë një rrezik serioz për lirinë e shprehjes dhe atë të medias në Shqipëri.
Në një deklaratë publike, organizatat theksojnë se nenet 865 dhe 863 që prekin fyerjen dhe shpifjen jo vetëm që nuk respektojnë rekomandimet e tyre të përsëritura dhe ato të institucioneve evropiane për dekriminalizimin e këtyre veprave, por përkundrazi, zgjerojnë sanksionet penale dhe fusha e zbatimit të tyre krijon rrezik frikësimi ndaj gazetarëve, aktivistëve dhe qytetarëve të angazhuar.
“Zgjerimi i përgjegjësisë penale për komentet në media apo rrjete sociale, rritja e gjobave dhe paqartësitë ligjore mund të çojnë në abuzim dhe ndëshkim selektiv. Në mënyrë të veçantë, dispozita si ajo që lejon justifikimin e deklaratave në ‘gjendje zemërimi’ krijon standarde të dyfishta për zyrtarët e pushtetshëm,” thuhet në reagim.
Organizatat po përgatisin një analizë të detajuar dhe kanë siguruar mbështetjen e rrjeteve europiane për lirinë e shprehjes, me një deklaratë të përbashkët që pritet të publikohet ditën e nesërme.
Sipas SCiDEV dhe SafeJournalists, drafti aktual nuk përfshin masat e posaçme të mbrojtjes për gazetarët, të rekomanduara prej kohësh në Platformën e Dialogut për Lirinë e Shprehjes dhe Sigurinë e Gazetarëve. Aty kërkohet qartazi dekriminalizimi i shpifjes, njohja e gazetarëve si kategori e mbrojtur dhe krijimi i një mekanizmi të reagimit të shpejtë institucional në rast sulmesh.
Përkundër këtyre kërkesave, neni 120 i draftit të ri vazhdon të penalizojë shpifjen dhe nuk ofron masa mbrojtëse për gazetarët. Po ashtu, neni 536 që ndëshkon ndërhyrjet në pavarësinë e gjyqësorit, rrezikon të kufizojë raportimin mediatik mbi çështjet gjyqësore, duke mos përjashtuar aktivitetin gazetaresk nga përgjegjësia penale.
Organizatat theksojnë se formulimi i përgjithshëm dhe i paqartë i disa neneve të draftit lë hapësirë për interpretim arbitrar dhe zbatim selektiv, në dëm të gazetarëve dhe lirisë së medias.
“Është shqetësuese mungesa e garancive ligjore për gazetarët që raportojnë për çështje të ndjeshme si korrupsioni apo abuzimi me detyrën. Ky draft, nëse miratohet në formën aktuale, do të përkeqësojë më tej klimën e pasigurisë për median e pavarur në Shqipëri,” përfundon deklarata./skyweb.al
