Sektorët e ndërtimit dhe energjisë kanë vijuar zgjerimin në tremujorin e dytë të vitit 2026, por të dhënat e INSTAT tregojnë se fondi i pagave po rritet dukshëm më shpejt se numri i të punësuarve.
Në sektorin e ndërtimit, shitjet neto në volum u rritën me 5.6% krahasuar me të njëjtën periudhë të një viti më parë, ndërsa prodhimi u rrit me 4.2%. Numri i të punësuarve u zgjerua me 5.2%, por fondi i pagave shënoi një rritje shumë më të fortë, prej 24.8%.
Pra, ndërsa punësimi në ndërtim është rritur me rreth 5%, masa totale e pagave dhe shpërblimeve të paguara nga bizneset e sektorit është rritur me afro 25% brenda një viti.
Një ecuri e fortë është regjistruar edhe në sektorin e energjisë elektrike, gazit dhe avullit. Shitjet neto në volum u rritën me 24.2%, ndërsa prodhimi me 20.6% krahasuar me tremujorin e dytë të vitit të kaluar.
Megjithatë, punësimi në këtë sektor u rrit vetëm me 3.2%, ndërsa fondi i pagave u zgjerua me 12.1%.
Të dhënat tregojnë se si ndërtimi ashtu edhe energjia po zgjerojnë aktivitetin ekonomik, por rritja e numrit të vendeve të punës mbetet dukshëm më e ulët se rritja e fondit të pagave.
Veçanërisht në ndërtim, diferenca është e fortë: punësimi +5.2%, fondi i pagave +24.8%. Në energji raporti është +3.2% punësim dhe +12.1% fond pagash.
INSTAT sqaron se indeksi i fondit të pagave mat ecurinë e fondit total të pagave, shpërblimeve dhe trajtimeve të punonjësve dhe nuk përfaqëson drejtpërdrejt ndryshimin e pagës mesatare individuale. /skyweb.al
