Detaje të reja janë zbardhur nga vendimi i qeverisë që përcakton rregullat për pavlefshmërinë e kontratave të PPP-ve.
Sipas vendimit, Komisioni i Prokurimit Publik (KPP) do të jetë organi kompetent që shqyrton ankesat për pavlefshmërinë e këtyre kontratave. Operatorët ekonomikë kanë të drejtë të paraqesin ankesë brenda 6 muajve nga dita pas lidhjes së kontratës.
Një nga elementet më të rëndësishme të procedurës lidhet me efektin e ankesës mbi vetë kontratën. Me marrjen e saj, KPP vendos me vendim të ndërmjetëm pezullimin e menjëhershëm të zbatimit të kontratës, deri në marrjen e një vendimi përfundimtar.
Megjithatë, vendimi parashikon edhe një përjashtim. KPP mund të lejojë vazhdimin e zbatimit të kontratës nëse vlerëson se pezullimi i saj mund të cenojë çështje thelbësore të interesit të përgjithshëm.
Pas shqyrtimit të çështjes, KPP mund ta shpallë kontratën absolutisht të pavlefshme, nëse konstatohen kushtet e parashikuara nga ligji për koncesionet dhe PPP-të. Pra, procedura e re krijon mundësinë që një kontratë e nënshkruar dhe në zbatim të ndalet dhe më pas të rrëzohet, nëse rezulton se janë plotësuar kushtet ligjore për pavlefshmërinë e saj.
Por edhe në rastet kur kontrata nuk shpallet e pavlefshme, KPP mund të marrë masa ndaj autoritetit apo entit kontraktor. Konkretisht, Komisioni mund të shkurtojë afatin e zbatimit të kontratës ose të vendosë gjobë për shkeljet e konstatuara.
Masa e gjobës lidhet me vlerën e kontratës së nënshkruar dhe nuk mund të jetë më e lartë se 10% e vlerës së saj. Në përcaktimin e gjobës do të merren në konsideratë rëndësia e shkeljes, pasojat, dëmi i shkaktuar, vlera e kontratës dhe nëse shkeljet janë përsëritur.
Vendimi sqaron gjithashtu se kostot që mund të lindin nga ndërprerja e kontratës, zhvillimi i një procedure të re koncesioni apo ndryshimi i operatorit ekonomik nuk konsiderohen, në vetvete, si arsye të mjaftueshme të interesit të përgjithshëm për të shmangur pavlefshmërinë e kontratës. /skyweb.al
