Rreth 30% e energjisë elektrike të konsumuar në Shqipëri gjatë muajit qershor u prodhua nga impiantet fotovoltaike. Sipas ministrit Karakaçi, kjo peshë ka mbetur pothuajse në të njëjtin nivel edhe gjatë muajve korrik dhe gusht.
Ministri theksoi se energjia diellore po luan një rol gjithnjë e më të rëndësishëm në sistemin elektroenergjetik shqiptar, veçanërisht gjatë muajve të verës. Në këtë periudhë, thatësira dhe rënia e nivelit të ujit në kaskadën e Drinit kufizojnë prodhimin nga hidrocentralet, duke rritur nevojën për burime alternative të energjisë.
Sipas të dhënave të bëra publike, prodhimi nga impiantet fotovoltaike deri në fund të gushtit arriti në 868 GWh, duke konfirmuar zgjerimin e kontributit të energjisë diellore në prodhimin vendas.
Karakaçi e cilësoi diversifikimin e burimeve energjetike si një faktor të rëndësishëm për rritjen e qëndrueshmërisë së sistemit elektroenergjetik dhe reduktimin e varësisë nga një burim i vetëm prodhimi.
Sipas tij, zgjerimi i kapaciteteve fotovoltaike është pjesë e strategjisë së qeverisë për rritjen e prodhimit vendas të energjisë dhe për arritjen e objektivit të pavarësisë energjetike deri në vitin 2030.
