Nisma vjen pas situatës së krijuar rreth rastit “Balluku” dhe mosmarrjes së një vendimi nga Gjykata Kushtetuese, çka sipas mazhorancës ka nxjerrë në pah nevojën për sqarim të kuadrit ligjor mbi ndarjen e kompetencave mes pushteteve.
Sipas asaj që u bë publike nga vetë Rama, propozimi do të depozitohet me firmën e tij, të kryetarit të grupit parlamentar socialist Taulant Balla dhe të kryetarit të Komisionit të Ligjeve Ulsi Manja. Nisma do të paraqitet fillimisht në mbledhjen e Grupit Parlamentar dhe më pas do të bëhet publike në prani të medias.
Kryeministri ka theksuar se çështja nuk lidhet me individë të caktuar, por me parimin e ndarjes së pushteteve, duke argumentuar se emërimi dhe shkarkimi i ministrave është kompetencë ekskluzive e pushtetit ekzekutiv dhe nuk mund të delegohet tek gjyqësori.
Sipas tij, një vendim gjyqësor për pezullimin e një ministri në kuadër të një mase sigurimi penal prodhon në praktikë një efekt të barabartë me shkarkimin, pasi funksioni i ministrit është i padelegueshëm dhe nuk mund të ushtrohet nga një tjetër person.
Mazhoranca synon që përmes ndryshimeve të propozuara të sqarojë këtë aspekt në mënyrë eksplicite në legjislacion, duke argumentuar se pavarësia e pushtetit gjyqësor duhet të respektohet, por pa cenuar kompetencat kushtetuese të pushtetit ekzekutiv dhe legjislativ. /skyweb.al
