Këshilli Mbikëqyrës i Bankës së Shqipërisë ka vendosur në mbledhjen e fundit të mos ndryshojë normën bazë të interesit, duke e mbajtur atë në nivelin 2.5%. Guvernatori Gent Sejko deklaroi se politika aktuale monetare mbetet e përshtatshme për të mbajtur nën kontroll inflacionin dhe për të ruajtur stabilitetin e çmimeve në afatin e mesëm.
Sipas Sejkos, qëndrimi aktual mundëson transmetimin gradual në tregjet financiare të uljes së normës bazë të interesit të ndërmarrë në fillim të korrikut, duke ofruar një balancë mes nxitjes së rritjes ekonomike në afat të shkurtër dhe ruajtjes së stabilitetit të çmimeve në afat të gjatë.
Megjithëse inflacioni ka pësuar një rritje të lehtë, ai ka rezultuar më i ulët se parashikimet e Bankës së Shqipërisë. Rritja është diktuar kryesisht nga çmimet e ushqimeve dhe qirave, ndërsa artikujt e tjerë të shportës kanë mbetur relativisht të qëndrueshëm. Faktori kryesor i diferencës me pritjet ka qenë ulja e marzheve të fitimit të bizneseve, efektet pozitive të ofertës dhe rënia më e shpejtë e inflacionit në Eurozonë.
Gjatë katër tremujorëve të fundit, lehtësimi i politikës monetare ka ulur kostot e financimit për sektorin bankar dhe yield-in e bonove 12-mujore të thesarit. Po ashtu, rritja e ndërhyrjeve të Bankës së Shqipërisë në tregun e brendshëm valutor ka ndihmuar në zbutjen e presioneve për forcimin e kursit të këmbimit. /skyweb.al
