Modeli ikonik francez pritet të rikthehet në treg në fund të vitit 2028, me një çmim fillestar të synuar prej rreth 15 mijë eurosh.
Një nga risitë më të shumëpritura të Panairit të Automjeteve në Paris është rikthimi i legjendës së automobilizmit francez, Citroën 2CV, këtë herë në një version plotësisht elektrik. Modeli i ri synon të ruajë filozofinë e paraardhësit të tij, duke ofruar thjeshtësi, prakticitet dhe një çmim të përballueshëm.
Sipas planeve të prodhuesit, automjeti pritet të dalë në shitje në fund të vitit 2028, në përkujtim të 80-vjetorit të prezantimit të modelit origjinal. Çmimi fillestar synohet të jetë rreth 15 mijë euro, ndërsa nuk përjashtohet mundësia e ofrimit edhe në një variant të vogël furgoni.
Për të mbajtur kostot sa më të ulëta, grupi Stellantis po synon të ndërtojë një automjet me peshë nën një ton dhe me një bateri relativisht të vogël, të përshtatur për udhëtimet e përditshme në qytet dhe distancat e shkurtra.
“2CV u bë një ikonë jo për shkak të asaj që kishte, por për shkak të asaj që u mundësonte njerëzve të bënin. Dhe sot, kjo frymë rikthehet”, deklaroi drejtori ekzekutiv i Citroën, Xavier Chardon, gjatë prezantimit të modelit.
Për momentin, automjeti ndodhet ende në fazën e konceptit, ndaj specifikimet teknike dhe çmimi përfundimtar mund të ndryshojnë përpara prodhimit.
Rikthimi i 2CV vjen në një kohë kur tregu evropian po orientohen gjithnjë e më shumë drejt automjeteve elektrike me çmime të përballueshme. Në Francë, makinat elektrike me bateri arritën një rekord prej 42% të regjistrimeve të automjeteve të reja në muajin shtator, sipas të dhënave të përmendura në raportim.
Një rol të rëndësishëm në këtë zhvillim po luajnë modelet e vogla elektrike dhe skema shtetërore e qirasë sociale, e cila regjistroi rreth 9.500 automjete gjatë muajit të fundit.
Ndërkohë, përballë konkurrencës në rritje nga prodhuesit kinezë, edhe markat e tjera evropiane po përpiqen të ofrojnë alternativa më ekonomike. Mes tyre janë Dacia Spring dhe Volkswagen ID. Polo.
Me rikthimin e 2CV, Citroën synon të ndërthurë trashëgiminë e një modeli historik me kërkesën moderne për makina elektrike të thjeshta dhe ekonomike. /skyweb.al
