Tirana përgatitet sot për një tjetër protestë të madhe, të paralajmëruar nga studentët dhe të rinjtë pas disa ditësh përplasjesh me policinë, arrestimesh dhe dëmesh në kryeqytet. Protestat kanë hyrë tashmë në ditën e katërt dhe kërkesa për largimin e qeverisë është bërë pjesë e thirrjeve të protestuesve.
Por pak përpara daljes së protestuesve në shesh, kryeministri Edi Rama e nisi ditën në terren, pranë një biznesi të dëmtuar gjatë protestave, duke dhënë një mesazh të qartë se nuk ka ndërmend të tërhiqet.
Rama njoftoi se qeveria do të ndihmojë bizneset e vogla që kanë pësuar dëme dhe se në e-Albania do të hapet një dritare e posaçme ku pronarët mund të deklarojnë humbjet.
Bizneset do të duhet të vendosin të dhënat e tyre, NIPT-in, kontaktet, vlerësimin e dëmit, kompaninë e sigurimit, si dhe të ngarkojnë fotografi dhe faturat që dokumentojnë dëmet.
Në terren do të dalin edhe 10 grupe të Tatimeve, të cilat do të verifikojnë deklarimet dhe do të krijojnë një regjistër të bizneseve të prekura.
“Ne do t’ju vijmë në ndihmë të gjithëve”, deklaroi Rama, duke premtuar se dëmet e shkaktuara gjatë protestave do të rikuperohen.
Rama i kërkon biznesit të ankohet te e-Albania për dëmet nga protestat
Por përtej faturave të bizneseve, mesazhi politik i kryeministrit ishte shumë më i gjerë.
Rama tha se respekton studentët dhe të drejtën e tyre për të protestuar, por vijoi të ndajë protestën nga dhuna, duke ia faturuar këtë të fundit forcave që qeveria i ka cilësuar ditët e fundit si “duar të zeza”, “duar të huaja” apo përpjekje për destabilizimin e vendit. Kjo gjuhë është përdorur nga qeveria edhe në reagimet e ditëve të fundit.
“I respektojmë studentët, i çmojmë si shtysën për të ecur më shpejt përpara. Zëri i tyre dhe i çdo të riu duhet dhe do të dëgjohet me respekt”, tha Rama.
Por ai shtoi edhe mesazhin që tregon qartë pozicionin e tij përballë kërkesave për largim: “S’do të lejoj askënd dhe asgjë të rrezikojë të ardhmen e këtij vendi.”
Ndryshe nga pritshmëritë e protestuesve që kërkojnë largimin e tij, Rama nuk dha asnjë sinjal dorëheqjeje. Përkundrazi, ai e vendosi veten dhe qeverinë në rolin e garantuesit të vazhdimit të rrugës së Shqipërisë drejt Bashkimit Europian, përballë asaj që ai e përshkruan si politikë dhune dhe ndërhyrje të “duarve të zeza”.
Kryeministri renditi gjithashtu arritjet që, sipas tij, janë shënuar gjatë qeverisjes së tij dhe la të kuptohet se ky kurs nuk do të ndërpritet nga protestat apo nga forcat që ai i konsideron përgjegjëse për dhunën. /skyweb.al
