Pas mesazheve se e sheh veten si misionar të rrugës europiane të Shqipërisë dhe premtimeve për shpërblime e rritje pagash për policinë, kryeministri Edi Rama dha një sinjal për nisjen e përpjekjeve serioze për gjetjen e një zgjidhjeje politike për krizën.
Në fund të fjalimit të tij të gjatë përpara efektivëve, ai shprehu gatishmërinë që edhe të shkojë vetë ku ta thërrasin për të diskutuar një zgjidhje.
Ndryshimi në formulim bie në sy. Nga ftesat që protestuesit të vinin në takim me të, Rama kaloi te gatishmëria për të shkuar, dëgjuar dhe kuptuar se ku mund të gjendet zgjidhja.
Dhe kjo nuk është thjesht një retorikë e Ramës për të zbutur protestuesit.
Ky sinjal vjen ndërsa, sipas burimeve të Skyweb.al, institucione të rëndësishme të Republikës së Shqipërisë, përfshirë ambasada të huaja, po përpiqen të krijojnë kushtet për një tryezë mes kryeministrit, forcave politike dhe protestuesve, me synim gjetjen e një zgjidhjeje politike.
Në këtë sfond, deklarata e Ramës duket si një përcaktim paraprak i kushteve me të cilat ai do të pranonte të përfshihej në bisedime.
Kryeministri tha se është i gatshëm për dialog në çdo orë, ditë dhe vend, por përjashtoi forcat politike që, sipas tij, qëndrojnë pas dhunës ose nuk distancohen prej saj. Ai përjashtoi gjithashtu “personat që hedhin gurë dhe ata që duartrokasin dhunën ndaj policisë”.
“Kushdo tjetër është i mirëseardhur apo jam gati të shkoj të dëgjoj”, u shpreh Rama.
Megjithatë, hapjen për dialog e shoqëroi me një kufi të prerë: Nuk pranon një marrëveshje që ndryshon drejtimin e qeverisë apo kursin politik të vendit.
Rama kundërshtoi atë që e quajti zgjidhje politike me “ndryshime artificiale të lidershipit”, duke paralajmëruar se një kompromis i tillë, në emër të qetësisë dhe paqes, “nuk ka dhe nuk do të ketë”.
Sipas të njëjtave burime të Skyweb.al, në përpjekjet për të ndërtuar këtë tryezë po diskutohet edhe pjesëmarrja e forcave politike. Berisha, sipas këtyre burimeve, nuk pritet të jetë i ftuar, çka i jep peshë kushtit të Ramës për përjashtimin e partive që ai i lidh me dhunën.
Për momentin, nuk është bërë publik një takim i dakordësuar, formati apo pjesëmarrësit. Por mesazhi i kryeministrit përcakton pozicionin me të cilin ai synon të hyjë në një dialog të mundshëm: Gatishmëri për të biseduar, pa negociuar largimin e tij. /skyweb.al
