Fundi i shtatorit nuk e ka zbehur interesin e turistëve të huaj për jugun e Shqipërisë. Porti i Sarandës vijon të jetë një ndalesë e preferuar për kroçerat ndërkombëtare.
Gjatë ditës së sotme, dy kroçera luksoze kanë ankoruar në portin e Sarandës, duke sjellë mbi 460 turistë nga vende të ndryshme të botës. Sipas të dhënave nga Autoriteti Portual, “Silver Ëhisper”, një kroçerë elegante që erdhi nga porti i Kotorit në Mal të Zi, solli në qytet 365 turistë, kryesisht nga Shtetet e Bashkuara të Amerikës. Pas ndalesës në Sarandë, ajo do të vazhdojë itinerarin drejt Gallipolit në Itali.
Turistët zgjodhën të eksplorojnë thesaret natyrore dhe kulturore të zonës përmes guidave të organizuara në Butrint, Syrin e Kaltër, Kantinën e Verës në Delvinë si dhe Gjirokastrën, qytetin e UNESCO-s.
Po ashtu, në portin e Sarandës mbërriti edhe kroçera “Emerald Azzurra” e kompanisë Emerald Cruises, me 99 turistë në bord, e cila gjithashtu kishte si pikënisje Kotorin dhe do të vazhdojë lundrimin drejt Korfuzit. Edhe këta vizitorë shfrytëzuan mundësinë për të njohur bukuritë e zonës përmes ekskursioneve të planifikuara.
Që prej muajit prill, kur nisi sezoni i lundrimeve turistike, Saranda ka qenë një nga portet më aktive në pritjen e kroçerave në vend. /Skyweb.al
