Gjatë një takimi me mësuesit, Rama ngriti shqetësimin për përhapjen e agresivitetit, kërcënimeve dhe përmbajtjeve të dëmshme në rrjetet sociale, të cilat sipas tij po ndikojnë drejtpërdrejt në jetën e fëmijëve dhe qetësinë e familjeve shqiptare.
Kryeministri deklaroi se ka ardhur momenti që institucionet të përcaktojnë mënyrën se si do të realizohet kufizimi i aksesit të fëmijëve në këto platforma.
“Është koha t’i japim përgjigje pyetjes sesi do të realizojmë ndalimin e rrjeteve sociale për fëmijët deri 16 vjeç dhe sesi do ta adresojmë gjithë këtë masë agresorësh që përmes rrjeteve sociale kërcënojnë dhe i marrin erëzin e qetësinë familjeve”, deklaroi Rama.
Sipas kryeministrit, rrjetet sociale janë kthyer në një mjedis ku të miturit ekspozohen ndaj agresivitetit dhe ndikimeve që mund të cenojnë zhvillimin dhe sjelljen e tyre.
Megjithatë, Rama nuk dha detaje konkrete mbi mekanizmin që do të përdoret për zbatimin e ndalimit, mënyrën e verifikimit të moshës apo masat që mund të ndërmerren ndaj platformave që nuk respektojnë kufizimet.
Nisma e paralajmëruar do të kërkonte përcaktimin e një kuadri ligjor dhe teknik për kontrollin e aksesit të të miturve në rrjetet sociale.
Deklarata vjen në një kohë kur përdorimi i platformave digjitale dhe ndikimi i tyre te fëmijët janë kthyer në pjesë të debatit publik, veçanërisht pas përfshirjes së adoleshentëve në protestat e ditëve të fundit. /skyweb.al
