Rreth 2.3 milionë raste të reja me kancer në mbarë botën në vitin 2024 u shkaktuan nga infeksionet virale, bakteriale dhe parazitare. Kjo shifër përbën 12% të të gjitha rasteve të reja të kancerit në botë, sipas një studimi të ri nga Agjencia Ndërkombëtare për Kërkimin e Kancerit (IARC), agjencia e Organizatës Botërore të Shëndetësisë për kancerin.
“Pavarësisht përparimit në vaksinim dhe depistim, kanceret e lidhura me infeksionet mbeten një sfidë e madhe globale, me barrën që bie në mënyrë disproporcionale mbi popullsitë e vendeve me të ardhura të ulëta dhe të mesme”, tha Harriet Rumgay, shkencëtare në Departamentin e Mbikëqyrjes së Kancerit në IARC dhe bashkëautore e studimit.
“Gjetjet nënvizojnë rolin e rëndësishëm që mund të luajë kontrolli i infeksioneve në reduktimin e barrës globale të kancerit”, shtoi ajo.
Autorët rekomandojnë masa që përfshijnë parandalimin parësor, depistimin, trajtimin, kërkimin shkencor dhe politikat, duke nisur nga zgjerimi i vaksinave ekzistuese dhe zhvillimi i vaksinave të reja, deri te zbatimi i masave specifike për kontrollin e parazitëve dhe zgjerimi i testimeve.
Investimi në “mjete të reja parandaluese mund të ketë ndikimin më të madh”, tha Gary Clifford, bashkëautor i lartë i studimit.
Një prej investimeve të ardhshme mund të lidhet me infeksione si virusi herpes Epstein-Barr (EBV), një nga viruset më të përhapura te njerëzit në botë, për të cilin aktualisht nuk ka një vaksinë të miratuar, tha Clifford. Ky infeksion mund të shkaktojë gjashtë lloje të ndryshme kanceri, përfshirë kancerin e fytit dhe atë të stomakut.
EBV është vetëm një prej 12 agjentëve infektivë të klasifikuar si kancerogjenë për njerëzit, ku përfshihen viruse, një bakter dhe parazitë.
Shkaktari infektiv kryesor i kancerit është Helicobacter pylori, një bakter që infekton stomakun dhe shpesh shkakton ulçera gastrike. Ai shkaktoi rreth 760 mijë raste të reja me kancer në vitin 2024, ose 4% të të gjitha rasteve.
Ky bakter lidhet me tre lloje kanceri: kancerin e stomakut jo-kardial dhe kardial, si dhe një formë të limfomës jo-Hodgkin që zhvillohet në stomak.
Virusi i papillomës njerëzore (HPV) renditet i dyti, duke qenë përgjegjës për rreth 750 mijë raste të reja, i ndjekur nga virusi i hepatitit B (HBV).
HPV mund të shkaktojë tetë lloje kanceri, nga kanceri i qafës së mitrës dhe i penisit deri te kanceri i laringut. Autorët theksuan se të gjitha rastet e kancerit të qafës së mitrës mund t’i atribuohen HPV-së, duke e bërë këtë virus një objektiv kryesor për strategjitë e depistimit dhe vaksinimit.
