Kompania daneze e shërbimeve postare do të shpërndajë letrat e saj të fundit më 30 dhjetor, duke mbyllur një kapitull që ka zgjatur më shumë se katër shekuj, raporton The Guardian.
Ky vendim i “PostNord”, kompani e themeluar në vitin 2009 nga bashkimi i shërbimeve postare të Danimarkës dhe Suedisë, përfaqëson një moment historik për një vend që sot renditet ndër më të digjitalizuarit në botë.
PostNord ka njoftuar se do të shkurtojë rreth 1 500 vende pune dhe do të heqë po aq kuti postare të kuqe, duke u përqendruar ekskluzivisht në shpërndarjen e pakove. Rënia drastike e dërgesave me letra, mbi 90% në 25 vitet e fundit, ka ardhur paralelisht me rritjen e ndjeshme të blerjeve online.
Kutia postare e kuqe, një simbol i njohur i postës daneze, tashmë është kthyer në objekt nostalgjie. Brenda vetëm tre orësh janë shitur 1 000 kuti të tilla, me çmime që varionin nga 1 500 deri në 2 000 korona daneze, ndërsa 200 të tjera pritet të nxirren në ankand në muajin janar.
Megjithatë, shërbimi i dërgimit të letrave nuk do të zhduket plotësisht. Kompania private “Dao” do ta marrë përsipër këtë detyrë, duke rritur kapacitetin e saj vjetor nga 30 milionë në 80 milionë letra. Qytetarët do të duhet t’i dorëzojnë letrat në pikat e “Dao” ose të paguajnë një tarifë shtesë për mbledhjen e tyre në shtëpi, ndërsa pullat do të blihen online ose përmes aplikacionit.
Ligji danez garanton që shërbimi i dërgimit të letrave të jetë gjithmonë i disponueshëm. Kjo do të thotë se, nëse “Dao” e ndërpret këtë shërbim, qeveria do të jetë e detyruar të caktojë një operator tjetër.
Sipas Ministrisë së Transportit, ky ndryshim ka më shumë vlerë emocionale sesa praktike, pasi qytetarët do të vazhdojnë të kenë mundësi të dërgojnë dhe të marrin letra. /skyweb.al
