Emiratet e Bashkuara Arabe kanë njoftuar se do të largohen nga organizatat OPEC dhe OPEC+, duke filluar nga 1 maji 2026, në një vendim që synon të përqendrojë politikat energjetike tek interesat kombëtare.
Vendimi u bë publik më 28 prill dhe, sipas deklaratës zyrtare të transmetuar nga mediat shtetërore, reflekton vizionin afatgjatë strategjik dhe ekonomik të vendit, si dhe ndryshimet në profilin e tij energjetik.
Autoritetet në Abu Dhabi theksuan se gjatë anëtarësimit në OPEC kanë dhënë kontribute të rëndësishme dhe kanë bërë sakrifica në funksion të interesit të përbashkët, por tashmë prioritet mbetet orientimi drejt politikave që i shërbejnë drejtpërdrejt ekonomisë kombëtare.
Ministri i Energjisë, Suhail Mohamed al-Mazrouei, deklaroi se vendimi është marrë pas një analize të detajuar të strategjive aktuale dhe të ardhshme të prodhimit, duke sqaruar se nuk ka pasur konsultime me vende të tjera, përfshirë Arabinë Saudite.
Dalja e Emirateve, një nga anëtarët historikë të OPEC që prej vitit 1967 përmes Abu Dhabit dhe më pas si shtet i pavarur në vitin 1971, pritet të dobësojë kohezionin e kartelit dhe të krijojë pasiguri në tregjet ndërkombëtare të energjisë.
Ky zhvillim vjen në një moment të tensionuar për tregun global, ndërsa lufta SHBA-Izrael kundër Iranit ka shkaktuar tronditje të forta në furnizimin me energji dhe ka rritur ndjeshëm çmimet e naftës.
Situata është komplikuar edhe më tej nga vështirësitë në transportin e naftës përmes Ngushticës së Hormuzit, një korridor strategjik nga ku kalon rreth një e pesta e furnizimit global me naftë dhe gaz të lëngshëm.
Largimi i Emirateve shihet si një goditje direkte për unitetin e OPEC, i cili tradicionalisht ka synuar të ruajë një qëndrim të përbashkët pavarësisht mosmarrëveshjeve të brendshme mbi kuotat e prodhimit dhe zhvillimet gjeopolitike.
