Për herë të parë është hapur një lidhje ajrore me hidroavion mes Greqisë dhe Shqipërisë, duke shënuar një zhvillim të ri në transportin rajonal dhe potencialisht, fillimin e një rrjeti të ri lidhjesh detare-ajrore në Mesdhe, shkruan Liv Kelly në median britanike “Time Out”.
Linja lidh qytetin e Janinës në veriperëndim të Greqisë me Vlorën në Shqipëri.
Për herë të parë, Greqia dhe Shqipëria po mundësojnë lidhjen me hidroavion, në një projekt të ri, që mund të hapë një rrjet tërësisht të ri udhëtimesh, në Mesdhe.
Operatori i quajtur “Hellenic Seaplanes” ka krijuar një lidhje ajrore mes Greqisë dhe Shqipërisë, në atë që mund të jetë fillimi i një rrjeti tërësisht të ri transporti për rajonin.
Ky projekt është bërë i mundur, falë një ftese zyrtare nga autoritetet shqiptare, dhe shihet si një tregues i bashkëpunimeve të ardhshme, në fushën e infrastrukturës detare dhe transportit.
Kjo linjë e veçantë lidh qytetin e Janinës në veriperëndim të Greqisë me qytetin bregdetar të Vlorës në Shqipëri, i cili konsiderohet si, porta hyrëse drejt Rivierës Shqiptare.
Sipas “Euronews”, rrjeti i hidroavionëve pritet të rrisë turizmin në rajonet e Adriatikut dhe Jonit, duke lidhur qytete bregdetare, ishuj dhe destinacione të tjera të njohura.
Çfarë është hidroavioni?
Ndryshe nga aeroplanët e zakonshëm që ulen në tokë, hidroavionët janë ndërtuar për t’u ngritur dhe për t’u ulur në det, prandaj janë idealë për destinacione më të largëta dhe më të vështira për t’u arritur.
Zakonisht, ata kanë kapacitet nga dy deri në 20 persona. Modelet e “Hellenic Seaplanes” zakonisht, kanë hapësirë për 9 deri në 19 pasagjerë.
“Hellenic Seaplanes” tashmë, operon aerodromet e saj të licensuara në Greqi, por ky është projekti i parë drejt zgjerimit ndërkombëtar.
Në të ardhmen, lidhjet mund të shtrihen deri në Mesdheun Lindor dhe madje edhe në Afrikën e Veriut, por mbetet për t’u ndjekur zhvillimet e mëtejshme.
