Departamenti i Thesarit të SHBA-se, është duke shqyrtuar përfshirjen e industrisë së stablecoin-eve, monedha digjitale të mbështetura me dollarë, si blerës të rinj të bonove të thesarit amerikan, në përpjekje për të rritur kërkesën për borxhin e ri publik që pritet të hidhet në treg gjatë tremujorëve të ardhshëm.
Sipas Financial Times, sekretari Scott Bessent ka zhvilluar bisedime me dy emetuesit kryesorë të stablecoin-eve në botë, Tether (USDT) dhe Circle (USDC), për të kuptuar se çfarë roli mund të luajë industria e kriptomonedhave në absorbimin e obligacioneve të reja amerikane, veçanërisht atyre afatshkurtra,3–6 mujore.
SHBA pritet të shesë një sasi rekord borxhi të ri në vitin 2025 për të mbuluar deficitin federal. Për të shmangur presionin mbi normat e interesit dhe për të garantuar shitjen e suksesshme të këtyre instrumenteve, Thesari kërkon investitorë të rinj strategjikë. Stablecoin-et, të cilat duhet të mbështeten 100% me asete likuide dhe të sigurta, aktualisht mbajnë miliarda dollarë në bono-thesari amerikane si kolateral për monedhat e tyre digjitale – dhe shpallen si potencial për të zgjeruar këtë pozicion.
Rregullimi ligjor, çelësi për hapjen e dyerve
Përfshirja formale e stablecoin-eve në skemën amerikane të borxhit kërkon miratimin e një kornize rregullatore të re. Bisedimet e Bessent me industrinë pritet të ndikojnë në hartimin e një plani zyrtar që do të prezantohet në muajt në vijim, ndërsa Departamenti i Thesarit po vlerëson rritjen e frekuencës së ankandeve të bonove afatshkurtra.
Fitim i dyanshëm
- Për SHBA-në: një kanal i ri likuiditeti për të financuar borxhin federal me kosto më të ulët.
- Për industrinë e kriptomonedhave: rritje e legjitimitetit dhe integrimit me sistemin financiar tradicional.
Ekspertët e tregut obligacionar e përshkruajnë lëvizjen si “pragmatike”, në një kohë kur investitorët klasikë po tregohen më të kujdesshëm ndaj borxhit amerikan për shkak të normave të larta të interesit./skyweb.al
