Skyweb.al
Ngjarje të njëpasnjëshme kanë tronditur opinionin publik në vend, duke ngritur pikëpyetje serioze mbi fuqinë reale të krimit të organizuar në Shqipëri.
Pasditen e së martës, biznesmeni dhe botuesi i “News24” dhe “Panorama Grup”, Irfan Hysenbelliu, u kërcënua me jetë bashkë me familjarët e tij.
Sipas mediave që ai drejton, kanosja ka ardhur nga një person i denoncuar më herët për afera të dyshuara korruptive në emisionet investigative, i cili raportohet se ka lidhje me segmente të larta të qeverisjes.
Familja Hysenbelliu ka paralajmëruar se do të ndjekë rrugën ligjore dhe do të dorëzojë prova për kërcënimin.
Vetëm një ditë më pas, pra sot, një tjetër ngjarje e rëndë u shënua në Tiranë: zhdukja në rrethana misterioze e ish-zv. drejtorit të Agjencisë Kombëtare për Shoqërinë e Informacionit (AKSHI), Daniel Shima.
Familjarët e tij kanë denoncuar në polici se kanë humbur kontaktet me të, ndërsa vetë Shima u kishte dërguar një mesazh të afërmve duke i njoftuar se “po e arrestonin”.
Pas këtij momenti, çdo komunikim me të është ndërprerë.
Policia ka nisur verifikimin e kamerave të sigurisë dhe po heton disa pista, përfshirë pengmarrjen.
Shima ka qenë një nga dëshmitarët kyç të aferave të tenderave të shumëpërfolur të AKSHI-t.
Ai është përmendur në mënyrë të përsëritur në deklarata publike nga ish.zv.kryeministri Ahmetaj si person i kërcënuar pasi shkarkimi i tij u firmos ditën që Drejtoresha Mirlinda Karçanaj u mos në pyetje në SPAK. Fill pasi doli nga dyert e SPAK ajo firmosi shkarkimin e Shimës duke ngjallur dyshime mbi kontributin e tij në hetimet e Prokurorëve të Posaçëm, si person në dijeni. Shima u mor për disa kohë edhe në mbrojtje nga Garda e Republikës.
Dy ngjarjet e ndodhura brenda 24 orësh, kërcënimi ndaj një botuesi të madh mediatik dhe zhdukja e një ish-zyrtari të lartë të lidhur me çështje sensitive korruptive, ngrejnë pyetjen e rëndë: A po dalin hapur mafia dhe krimi i organizuar duke sfiduar shtetin dhe institucionet tani?!
Deri tani, roli i SPAK kishte trembur politikanë super të fuqishëm dhe trafikantë ndërkombëtarë kokaine, me buxhete më të mëdha se të policisë, por dy ngjarjet e fundit duket se tregojnë se krimi i organizuar është trimëruar sëfundmi.
Hetimet për të dy rastet janë në zhvillim, ndërsa opinioni publik pret me shqetësim përgjigjet që do të përcaktojnë nëse këto episode janë të izoluara apo tregues i një realiteti ku krimi është bërë më i fuqishëm se vetë shteti…
