Shqipëria duket se po humbet ritmin e rritjes turistike që e karakterizoi vitet e fundit. Të dhënat e publikuara nga INSTAT për muajin korrik 2025 tregojnë se hyrjet e shtetasve të huaj në vend kanë shënuar një rritje minimale prej vetëm 0.4%, krahasuar me korrikun e një viti më parë.
Në total, në territorin shqiptar kanë hyrë 1.825.490 turistë të huaj, rreth 7 mijë më shumë se në korrik 2024 duke pasqyruar një ngecje.
Në tërësi, numri i hyrjeve të shtetasve shqiptarë dhe të huaj gjatë korrikut arriti në 2 663 010, një rritje prej 1.5%. Ndërkohë, daljet ishin më të larta, duke u rritur me 9.6% duke arritur në 2 576 342 persona. Gjatë korrikut 2025 kanë dalë nga Shqipëria rreth 78 000 shqiptarë (shih tabelën) duke pasqyruar një tendencë në rritje të bërjes së pushimeve jashtë.
Shifrat tregojnë qartë se Shqipëria nuk po ofron më të njëjtin model konkurrues të “turizmit të lirë” që e solli në qendër të vëmendjes ndërkombëtare.
Çmimet më të larta, oferta e kufizuar e shërbimeve dhe konkurrenca rajonale duket se kanë zbehur interesin, duke sjellë një rritje të papërfillshme në kulmin e sezonit turistik.
Një tjetër tregues problematik është se hyrjet e huajve për pushime dhe vizita te të afërm ranë me 3.3% krahasuar me korrikun e vitit të kaluar. Rritje kanë shënuar vetëm hyrjet për qëllime biznesi dhe profesionale (+15.6%) dhe ato për tranzit, duke sinjalizuar një ndryshim në profilin e vizitorëve.
Nga janari deri në korrik 2025, Shqipëria ka pritur rreth 6.6 milion shtetas të huaj, një rritje prej 3.5% në krahasim me të njëjtën periudhë të vitit 2024. Por ky ritëm është ndjeshëm më i ulët se vitet e mëparshme, kur fluksi turistik shënonte rritje dyshifrore.
Mesazhi i korrikut është i qartë: Shqipëria nuk është më destinacioni i turizmit masiv me kosto të ulët, ndërsa trendi i promovimit përmes rrjeteve sociale e mediave online duket se nuk po e gjeneron më rritjen e shpejtë të vizitorëve. /skyweb.al
