Këshilli për Bashkëpunim Rajonal (RCC) ka hapur aplikimet për edicionin e katërt të Çmimit Rajonal të Inovacionit Butterfly 2025, një nismë që vlerëson idetë më me ndikim, të përshkallëzuara dhe të bazuara në treg nga Ballkani Perëndimor.
Këtë vit, 6 idetë më të mira do të shpërblehen me deri në 5,000 euro secila, duke nxitur zhvillimin ekonomik dhe kulturën e inovacionit në rajon.
Aplikimet janë të hapura për individë dhe ekipe të reja nga Ballkani Perëndimor në këto kategori:
- Inovacioni në Industri (automotiv, përpunim metalesh, industri kreative, agroushqimore, ekonomi e gjelbër dhe qarkulluese, turizëm, fintech, edtech, biotech, healthtech etj.)
- Inovacioni i Gjelbër (klima, energjia e qëndrueshme, mobiliteti, bujqësia, biodiversiteti)
- Inovacioni në STEM (shkencë, teknologji, inxhinieri, matematikë)
- Inovacioni Rinor (për studentët e universiteteve dhe nxënësit e shkollave të mesme)
- Inovacioni Universitar (nxitja e sipërmarrjes në universitete)
- Inovacioni i Grave (për gratë inovatore dhe sipërmarrëse)
Afati i fundit për aplikim është 8 tetor 2025, në mesnatë, ndërsa fituesit do të shpallen në nëntor.
I nisur në vitin 2022, Çmimi Butterfly është kthyer në një platformë rajonale që promovon transformimin digjital, qëndrueshmërinë mjedisore dhe fuqizimin e grupeve të nënpërfaqësuara, sidomos të rinjve dhe grave.
Në tre edicionet e kaluara janë vlerësuar 18 zgjidhje inovative nga i gjithë rajoni.
Çmimi Butterfly 2025 synon të frymëzojë shembujt më të spikatur të bashkëpunimit, krijimtarisë dhe inovacionit në Ballkanin Perëndimor.
/skyweb.al
