Makinat që drejtohen vetë po bëhen gjithnjë e më të zakonshme në rrugët e qyteteve amerikane dhe kineze, por në Europë ato ende perceptohen si një realitet i largët.
Ndërsa SHBA dhe Kina po avancojnë me shpejtësi në këtë fushë, kontinenti europian rrezikon të mbetet pas në garën për inovacion.
Sipas The Economist, ky boshllëk teknologjik kujton “momentin Sputnik”, kur nisja e satelitit sovjetik tronditi Perëndimin duke i bërë të vetëdijshëm për hendekun që kishte krijuar teknologjia.
Për shumë politikanë dhe investitorë europianë, mungesa e robotaksive në qytetet e kontinentit është sinjali se epoka e re e transportit autonom mund të kalojë përtej Atlantikut dhe në Azi, duke e lënë Europën në hije.
Por pikërisht ky disavantazh mund të shërbejë si një pikë kthese.
Robotaksitë mund të bëhen nxitësi që qytetarët dhe qeveritë europiane të kuptojnë sesa shumë kanë mbetur prapa dhe të investojnë më fuqishëm në teknologjitë e së ardhmes. /skyweb.al
