Një skemë piramidale online ka goditur qytetin e Divjakës, duke joshur qindra banorë përmes premtimeve për fitime të shpejta. Josif Kruti, një banor i zonës, ka rrëfyer për A2 CNN detaje nga mënyra se si funksionoi mashtrimi me platformën TXEX, ku “agjentë” të vetëshpallur bindnin qytetarët të investonin shuma nga 1 deri në 4 milionë lekë të vjetra.
“Unë dhe bashkëshortja nuk guxuam kurrë, pasi kemi pasur përvojën e hidhur të viteve 1996-1997,” tregon Kruti. Sipas tij, edhe pse kishte presione nga të afërm dhe të rinj që e shikonin si një mundësi të lehtë fitimi, ai nuk pranoi të regjistrohej. “Shoqet e djalit, ish-nxënës, madje edhe miq e shokë, më thoshin ‘është e sigurt, një milion nuk është gjë’. Por unë u thosha: si guxoni të rrezikoni kështu?”
Kruti zbulon se në Divjakë vepronin të paktën katër persona si “agjentë kryesorë”, të cilët i bindnin njerëzit duke u treguar se ata vetë po fitonin. Fillimisht, disa banorë hodhën shuma të vogla, por më pas investuan kursime të tëra, duke besuar se do të dyfishoheshin. “Në tavolina kafenesh flitej hapur, dikush thoshte hodha dy milionë, një tjetër katër milionë. Por në fund, të gjithë humbën,” rrëfen ai.
Sipas dëshmisë, pjesëmarrësit u bënë të varur nga skema, duke lënë punët për të ndjekur oraret e caktuara të programit online ku shihnin në ekran lëvizjet e shumave. “Ishin bërë si të dehur pas kësaj. U dukej sikur paratë po shtoheshin vetë,” shtoi Kruti.
Investimet kryheshin përmes filialeve të bankave, ku paratë kaloheshin në adresat e platformës TXEX, që më pas zhdukej pa lënë gjurmë.
Ajo që e bën skemën edhe më të rrezikshme është fakti se viktimat nuk ishin vetëm qytetarë të thjeshtë, por edhe njerëz me arsim të lartë, madje edhe mësues. “Më thoshin, provo me një milion nga lekët e mia, është e sigurt,” tregon Kruti, por ai refuzoi.
Ngjarja në Divjakë ka hapur plagët e vjetra të traumës së skemave piramidale të viteve ’90, duke rikthyer frikën se mashtrime të tilla po marrin jetë të re online dhe po dëmtojnë edhe një herë qytetarët shqiptarë.
