Qeveria ka reaguar për herë të parë ndaj akuzave të ish-zëvendëskryeministrit Arben Ahmetaj për përfshirjen e zyrtarëve shqiptarë në trafik armësh.
Pas mbledhjes së qeverisë, ministrja për Shtetin dhe Parlamentin, Erjona Ismaili, deklaroi se pretendimet e Ahmetajt nuk qëndrojnë.
Ajo e akuzoi ish-zyrtarin e lartë se po hedh “llum” mbi punën e qeverisë dhe i kërkoi të kthehet në Shqipëri për t’u përballur me drejtësinë.
“Zotëria, siç hedh llum ndaj punëve të qeverisë, të gjejë guximin dhe të vijë të përballet me drejtësinë”, u shpreh Ismaili për mediat.
Reagimi vjen disa ditë pasi Arben Ahmetaj, i cili ndodhet në arrati, ngriti akuza ndaj qeverisë dhe disa zyrtarëve, të cilët, sipas tij, janë përfshirë në një skemë të trafikut të armëve.
Ahmetaj pretendoi se armët silleshin nga Afrika në Shqipëri, ku paketoheshin dhe më pas rieksportoheshin drejt vendeve të tjera. Deri tani, ai nuk ka paraqitur publikisht prova të plota që vërtetojnë këto pretendime.
