Numri i shtetasve shqiptarë të rikthyer në atdhe gjatë vitit të kaluar ka shënuar rënie krahasuar me një vit më parë. Sipas të dhënave nga Profili Vjetor i Migracionit, në vitin 2024 janë kthyer në Shqipëri 7,901 persona, rreth 4% më pak se në vitin 2023, kur totali arriti në 8,224 shtetas.
Kthimet, të cilat shpesh lidhen me deportime apo arsye të tjera ligjore, kanë ndjekur një prirje të qëndrueshme, por në rënie gjatë dy viteve të fundit. Sipas ekspertëve, ky fenomen mund të shpjegohet me ndryshimet në politikat migratore të vendeve pritëse, përforcimin e kontrolleve kufitare, si dhe me uljen e flukseve migratore nga Shqipëria drejt vendeve të BE-së dhe zonës Shengen.
Një pjesë e madhe e këtyre kthimeve është rezultat i operacioneve të përbashkëta të riatdhesimit, të realizuara në bashkëpunim midis autoriteteve shqiptare dhe atyre të vendeve të tjera.
Të dhënat tregojnë se meshkujt përbëjnë shumicën dërrmuese të të kthyerve, me rreth 95%. Nga 7,901 shtetas të kthyer në 2024, 7,521 ishin meshkuj, ndërsa vetëm 380 femra. Kjo përputhet me tendencat globale të migracionit, ku burrat dominojnë sidomos në rastet e kthimeve dhe deportimeve.
Megjithatë, pavarësisht këtij trendi në ulje, Shqipëria vijon të mbajë një potencial të lartë emigrator. Ekspertët theksojnë se gjatë viteve të fundit është vënë re një ndryshim në profilin e emigrantëve shqiptarë, jo vetëm në aspektin e destinacioneve të preferuara, por edhe në faktorët ekonomikë e socialë që i nxisin ata të emigrojnë. /Skyweb.al
