Shtetet e Bashkuara janë importuesi më i madh i kafesë në botë dhe konsumatorët amerikanë mbështeten pothuajse tërësisht tek furnizuesit e huaj. Sipas të dhënave të Shoqatës Kombëtare të Kafesë, rreth 99% e kafesë që konsumohet në vend vjen nga jashtë, pasi klima amerikane lejon kultivimin vetëm në zona të kufizuara si Havai dhe Porto Riko.
Sipas CNN, kjo varësi e plotë nga importet e bën tregun amerikan të ndjeshëm ndaj ndryshimeve në politikat tregtare. Gjatë administratës së Donald Trump, SHBA vendosi tarifa mbi një sërë produktesh të huaja, çka ndikoi edhe tek çmimet e kafesë. Brazili, i cili mbetet furnizuesi kryesor i kafesë për amerikanët, është një ndër partnerët më të rëndësishëm në këtë zinxhir tregtar, sipas të dhënave të Departamentit Amerikan të Bujqësisë (USDA).
Ekspertët paralajmërojnë se çdo rritje e tarifave doganore mbi produktet bujqësore rrezikon të përkthehet në çmime më të larta për konsumatorët, duke qenë se SHBA nuk ka mundësi të zëvendësojë prodhimin e munguar me burime të brendshme. /skyweb.al
