Një protestë e organizuar nga aktivisti i ekstremit të djathtë Tommy Robinson ka përfunduar me përplasje të dhunshme në qendër të Londrës. Më shumë se 110 mijë persona morën pjesë në tubimin e quajtur “Unite the Kingdom Rally”, ku protestuesit, duke valëvitur flamujt e Mbretërisë së Bashkuar dhe të Anglisë, marshuan drejt zonës qeveritare të Whitehall, ku ndodhen ndërtesat kryesore të qeverisë dhe zyra e kryeministrit.
Gjatë protestës pati përplasje me forcat e rendit, ku policët u sulmuan me shishe dhe sende të tjera të forta. Policia raportoi për 25 arrestime dhe paralajmëroi se numri mund të rritet në orët në vijim.
Ndër folësit kryesorë të protestës ishte edhe miliarderi Elon Musk, i cili u lidh me një videomesazh. Ai foli kundër, siç e quajti, “migracionit të pakontrolluar” në Mbretërinë e Bashkuar dhe kërkoi ndryshim të qeverisë.
“Duhet bërë diçka. Duhet të shpërbëhet Parlamenti dhe të zhvillohen zgjedhje të reja,” deklaroi Musk.
Kryebashkiaku i Londrës, Sadiq Khan, e dënoi protestën duke theksuar se “dhuna dhe sulmet ndaj policisë janë plotësisht të papranueshme”.
Organizatori i protestës, Tommy Robinson, emri i vërtetë i të cilit është Stephen Yaxley-Lennon është një figurë e njohur e ekstremit të djathtë në Britani, i famshëm për qëndrimet e tij kundër islamit dhe emigracionit. Ish-drejtues i Lidhjes Angleze të Mbrojtjes (EDL), një organizatë tashmë e shpërbërë, Robinson ka qenë shpesh në qendër të vëmendjes për protestat e tij të dhunshme dhe retorikën islamofobike.
“Britania më në fund është zgjuar. Kemi pritur me dekada. Patriotizmi është e ardhmja, kufijtë janë e ardhmja, dhe ne duam lirinë e fjalës”, deklaroi Robinson. /Skyweb.al
