Shqipëria po kthehet në një nga destinacionet më të veçanta dhe autentike për pushime në Evropë, duke ofruar bukuri natyrore të paprekura, mikpritje të ngrohtë dhe çmime të përballueshme. Në një artikull të publikuar në të përditshmen italiane “wom Travel”, gazetarja Rosanna Carrizzo e përshkruan Shqipërinë si një vend të magjepsës, ku ende mund të gjesh plazhe të qeta dhe të virgjëra, larg turizmit masiv.
Me një vijë bregdetare prej 363 kilometrash, e lagur nga detet Adriatik dhe Jon, Shqipëria ofron një shumëllojshmëri peizazhesh që i përshtaten çdo lloj pushimi. Bregdeti Adriatik, që shtrihet nga kufiri me Malin e Zi deri në Vlorë, është i njohur për plazhet me rërë të artë dhe ujërat e cekëta, ideale për familje dhe fëmijë. Durrësi, Golemi dhe Velipoja janë ndër vendet më të frekuentuara në këtë zonë, të cilat ofrojnë gjithashtu dhe bukuri natyrore si laguna e rezervate.
Në momentin që kalon Qafën e Llogorasë, peizazhi ndryshon rrënjësisht. Riviera Shqiptare në detin Jon shfaq një bukuri më të egër, me gjire të fshehura, shkëmbinj, plazhe me guralecë të bardhë dhe ujëra të kristalta që ngjajnë me ato të Karaibeve. Kjo zonë është perfekte për ata që kërkojnë një përvojë më intime me natyrën, zhytje me maskë apo thjesht qetësi larg zhurmës.
Ndër plazhet më të njohura në jug të vendit është Ksamil, i quajtur shpesh “perla e Rivierës”. Me rërën e bardhë dhe ishujt përballë që mund të arrihen me not ose varkë, ai ofron një pamje tropikale dhe një atmosferë relaksuese. Pranë ndodhet edhe Plazhi i Pasqyrave, i emërtuar për shkak të qartësisë së jashtëzakonshme të ujërave të tij. Një tjetër plazh që nuk duhet humbur është Gjipeja, i vendosur në fund të një kanioni dhe i arritshëm vetëm me ecje ose me varkë, ky është një nga vendet më të virgjëra dhe spektakolare të bregdetit shqiptar.
Po ashtu, Dhërmiu dhe Himara mbeten destinacione të dashura për pushuesit që kërkojnë kombinimin mes relaksit dhe jetës së natës, ndërsa Borshi ofron hapësira më të gjera dhe më pak të frekuentuara, të rrethuara nga ullishte të pafundme. Livadhi, Porto Palermo, Kakome dhe Krorëza janë gjithashtu disa nga perlat e tjera të bregdetit Jonian, që ofrojnë përvoja unike, shpesh të arritshme vetëm me varkë ose rrugë të izoluara.
Në qendër të këtij rajoni ndodhet Saranda, një qytet bregdetar i gjallë dhe modern që përballë ka ishullin grek të Korfuzit. Saranda, e njohur edhe si “Qyteti i Bardhë”, është një pikënisje e shkëlqyer për të eksploruar plazhet përreth, vendet arkeologjike si Butrinti, një trashëgimi botërore e UNESCO-s apo mrekullinë natyrore të Syrit të Kaltër. Nga Kështjella e Lëkurësit, vizitorët mund të shijojnë një pamje panoramike mahnitëse të gjithë gjirit.
Në tërësi, Shqipëria mbetet një nga destinacionet më tërheqëse dhe ende të pazbuluara të Mesdheut. Me ujëra të kristalta, peizazhe të larmishme, kuzhinë të shijshme dhe njerëz të mikpritës, ajo ofron gjithçka që një udhëtar kërkon, me çmime që nuk e rëndojnë portofolin. Një vend që, dikur i harruar nga turistët evropianë, po fiton me të drejtë vëmendjen që meriton. /Skyweb.al
