Gjatë një fluturimi të Ryanair nga Vitoria në veri të Spanjës drejt Palmës së Majorkës, dy pjesëtarë të ekuipazhit u lënduan pas tronditjeve të rënda që ndodhën vetëm pak para uljes. Incidenti ndodhi ndërkohë që avioni po afrohej në Palma, në kushtet kur ishulli ishte përfshirë nga një stuhi e fuqishme.
Një prej stjuardesave u përplas me forcë mbi tavanin e kabinës, ndërsa tjetra u lëndua nga karroca e shërbimit. Në bord ishin rreth 180 pasagjerë, të cilët u tmerruan nga lëkundjet papritmas. Pas uljes, një ambulancë priti avionin në aeroport për të asistuar ekuipazhin e plagosur.
Ky rast nuk është unik. Vetëm disa muaj më parë, një fluturim i Ryanair nga Berlini në Milano pati nëntë të lënduar nga turbulenca ekstreme, duke detyruar një ulje emergjente. Pasagjerët raportuan se u hodhën nga ulëset dhe u përplasën me tavanin. Ngjashëm, në mars një fluturim të United Express në Teksas iu desh të ulte emergjentisht pas plagosjes së pesë pasagjerëve për shkak të turbulencës, ndërsa në nëntor një avion i Scandinavian Airlines u godit fort nga stuhia mbi Grenlandë. /Skyweb.al
