Gjatë konferencës “Shqipëria, Horizonti i Ri” të mbajtur në Vjenë, Kryeministri Edi Rama i ftoi investitorët e huaj të blejnë prona në Shqipëri, duke theksuar se çmimet e tregut do të vijojnë të rriten dhe mund të dyfishohen pas anëtarësimit të vendit në Bashkimin Europian.
I pyetur nga një investitor për zgjatjen e sezonit turistik përtej 180 ditëve, Rama tha se sezoni tashmë po zgjatet, me rritje të dukshme të numrit të vizitorëve krahasuar me vitin e kaluar. Megjithatë, ai e pranoi se sfida mbetet shtrirja e aktivitetit turistik përgjatë gjithë vitit. Sipas tij, kjo mund të arrihet përmes angazhimit të përbashkët të qeverisë dhe sektorit privat, veçanërisht duke synuar turistë të qëndrueshëm, si pensionistë nga vendet e Europës Veriore.
Rama nënvizoi gjithashtu potencialin e lartë të tregut të pasurive të paluajtshme në Shqipëri, ku ende ka prona me çmime të përballueshme. Ai i inkurajoi investitorët që të blejnë apartamente apo toka në qytete si Tirana, duke theksuar se ato mund të shiten me fitim të madh në të ardhmen, veçanërisht pas integrimit të Shqipërisë në BE. “Blini tani dhe shisni më vonë me çmim të dyfishtë”, tha Rama. /Skyweb.al
