Një analizë e fundit e prestigjiozes The Economist vë në qendër të vëmendjes gjeneratën X, duke e cilësuar si “humbësen e vërtetë” në garën ekonomike mes brezave.
Ndërsa vëmendja publike shpesh është përqendruar te Millennialët dhe Gen Z, raporti thekson se ata që sot janë në të 40-at dhe 50-at e tyre kanë përjetuar ngadalësinë më të madhe në rritjen e të ardhurave dhe pasurisë.
Sipas analizës, gjatë periudhës kur duhej të shënonin ngjitjen më të fortë në karrierë dhe të ardhura, në të 30-at dhe 40-at, tregu i punës ishte i dobët, duke i penalizuar krahasuar me gjeneratat pasardhëse.
Edhe në aspektin e pasurisë, Gen X rezulton të ketë përqindje më të ulët të zotërimit të pronave në të njëjtën moshë, krahasuar me Millennialët dhe gjeneratat e tjera në të kaluarën.
Artikulli nënvizon se kjo gjeneratë nuk ka humbur për shkak të mungesës së aftësive, por për shkak të rrethanave historike dhe krizave ekonomike që i goditën pikërisht në momentet më vendimtare të zhvillimit profesional.
Për më tepër, Gen X shpesh ka mbetur jashtë fokusit të diskursit publik dhe politik, i cili është përqendruar te nevojat e brezave më të rinj.
Për The Economist, humbja e madhe e Gjeneratës X është fakti se, ndonëse u rritën mes pritshmërive për sukses, sot gjenden të mbërthyer mes brezave më të privilegjuar financiarisht dhe më të përkëdhelur nga politikat publike. /skyweb.al
