Çmimi i arit ka kaluar për herë të parë në histori nivelin prej 4,000 dollarësh për ons (rreth 31.1 gramë), duke shënuar një rekord të ri në tregjet ndërkombëtare.
Rritja e ndjeshme është pasojë e valës së fortë të kërkesës për asete të sigurta, ndërkohë që pasiguria ekonomike dhe politike po thellohet në shumë vende të botës.
Vetëm gjatë këtij viti, çmimi i arit është rritur me mbi 50 për qind, ndërsa në dy vitet e fundit vlera e tij është pothuajse dyfishuar.
Ekspertët e lidhin rritjen me disa faktorë kryesorë: dobësimin e dollarit amerikan, pritshmëritë për ulje të normave të interesit nga Rezerva Federale, si dhe blerjet e mëdha të arit nga bankat qendrore në Azi dhe Lindjen e Mesme.
Në periudha të pasigurta, ari shihet tradicionalisht si “strehë e sigurt” për ruajtjen e vlerës së pasurisë.
Dobësimi i dollarit e bën edhe më tërheqës për blerësit që përdorin valuta të tjera, ndërsa fondet e investimeve që ndjekin çmimin e arit po regjistrojnë hyrje rekord të kapitalit.
Megjithëse pjesa më e madhe e analistëve e shohin këtë trend si të qëndrueshëm, disa paralajmërojnë për korrigjime afatshkurtra, pasi tregu mund të jetë “i mbingarkuar” pas disa javësh rritjeje të pandërprerë.
Sipas vlerësimeve të bankave kryesore, çmimi i arit pritet të mbetet mbi 3,700–3,800 dollarë për ons edhe në rast të një tërheqjeje të lehtë, ndërsa për periudhën afatgjatë mund të qëndrojë në nivele të larta, nëse pasiguria globale dhe borxhi publik vijojnë të rriten.
Rritja historike e arit konfirmon se tregjet botërore po kalojnë një periudhë tensioni, ku frika nga inflacioni dhe pasiguria politike kanë rikthyer metalin e çmuar në qendër të vëmendjes si simbol të stabilitetit financiar. /skyweb.al
