Bashkitë e Shqipërisë do të kenë së shpejti akses falas në internet publik, falë një granti prej 15 milionë eurosh nga Bashkimi Evropian dhe një kontributi shtesë nga Gjermania.
Projekti rajonal “WiFi4WB” do të sjellë rrjete Wi-Fi falas në hapësira publike si sheshe, parqe, biblioteka dhe godina publike në të 61 bashkitë e vendit.
Sipas Delegacionit të BE-së në Shqipëri, nisma synon të ofrojë më shumë mundësi për qytetarët, studentët dhe bizneset, duke lehtësuar aksesin në informacion dhe shërbimet digjitale.
Familjet do të kenë mundësi të qëndrojnë të lidhura, ndërsa bizneset e vogla të përmirësojnë ofertat e tyre online.
Ambasadori i BE-së në Shqipëri, Silvio Gonzato, theksoi se projekti nuk ka të bëjë vetëm me teknologjinë, por edhe me fuqizimin e komuniteteve dhe integrimin e rajonit në Tregun Unik Digjital të BE-së.
“Ky projekt ndihmon qytetarët e Shqipërisë dhe të rajonit të ndiejnë përfitimet e integrimit evropian edhe para anëtarësimit,” u shpreh Gonzato. /skyweb.al
