Një sondazh ndërkombëtar i realizuar nga Edelman Trust Barometer ka zbuluar një prirje shqetësuese: njerëzit në vendet e pasura nuk besojnë më se të punuarit fort dhe përkushtimi sigurojnë një jetë të qëndrueshme apo të suksesshme.
Përkundrazi, shumë e konsiderojnë këtë ide një “mashtrim” të sistemit ekonomik.
Sipas raportit, shumica e të anketuarve në vendet e zhvilluara nuk besojnë se do të jenë më mirë pas pesë vitesh, pavarësisht rritjes ekonomike.
Kjo tregon se pabarazia, dhe jo më rritja e prodhimit apo tregjeve, është bërë faktori kryesor që përcakton nivelin e besimit të qytetarëve te institucionet.
Në tregjet e zhvilluara, frika nga automatizimi, mungesa e trajnimeve profesionale dhe pasiguria e ekonomisë së punëve të përkohshme (gig economy) po shkatërrojnë bindjen tradicionale se përpjekja personale sjell përparim.
Raporti vë në dukje edhe një ndarje të thellë midis elitës shoqërore dhe publikut të gjerë.
Në nivel global, 65% e të ashtuquajturit “publik i informuar”, persona me arsim dhe të ardhura të larta, kanë besim te institucionet, ndërsa vetëm 51% e popullsisë së përgjithshme ndajnë të njëjtin qëndrim.
Në Australi, hendeku është edhe më i madh: 68% kundrejt vetëm 45%.
Më shumë se gjysma e të anketuarve në mbarë botën shprehen se kapitalizmi në formën e tij aktuale po bën më shumë dëm sesa mirë, duke sinjalizuar një krizë të thellë besimi ndaj sistemeve që dikur premtonin drejtësi dhe përparim shoqëror. /skyweb.al
