Emilia D’Albero ka hyrë në histori si amerikania e parë që fiton Mondial du Fromage, një konkurs prestigjioz ndërkombëtar i njohur si Kupa Botërore e Djathit, që mbahet çdo dy vjet në qytetin Tours të Francës, shkruan CNN.
E emocionuar teksa nuk mbajti dot edhe lotwt kur dëgjoi emrin e saj si fituese, D’Albero theksoi rëndësinë që kjo fitore ka jo vetëm për të, por edhe për mënyrën si perceptohet profesioni i djathëtarit në SHBA. “Në Evropë, është një profesion i respektuar, por në Amerikë mendojnë se punojmë pas banakut të supermarketit,” u shpreh ajo.
Garat përfshijnë prova të vështira si testime të verbëra të shijes, prerje precize të djathit pa mjete matëse, prezantime me gojë, teste me pyetje të ndërlikuara, dhe në fund – krijimi i një skulpture 3D nga djathi. Skulptura fituese e D’Albero përshkruante fazat e hënës.
Së bashku me të, amerikania tjetër Courtney Johnson fitoi medaljen e bronztë, ndërsa medalja e argjendtë shkoi për francezin Matthieu Thuillier. Kjo ishte hera e parë që SHBA përfaqësohej nga dy gra dhe të dyja u ngjitën në podium.
Pas fitores, D’Albero dhe Johnson udhëtuan në Francë dhe Itali për të shijuar sa më shumë lloje djathi. “Djathi është për të gjithë,” tha D’Albero. “Është ushqim i klasës punëtore dhe duhet të jetë i qasshëm për të gjithë.”
/Skyweb.al
