Një avion i kompanisë Wizz Air, që po kthehej nga samiti i paqes në Lindjen e Mesme, ka kryer një ulje emergjente në aeroportin e Napolit pasi pasagjerët raportuan një shpërthim në pjesën ku qendrojnë ngarkesat.
Fluturimi W46118, që operonte nga Sharm el-Sheikh drejt Romës më 14 tetor, humbi papritur lartësi nga 34 mijë në 13 mijë “feet” brenda vetëm tetë minutash.
Në bord ndodheshin disa gazetarë dhe ekipe televizive që kishin mbuluar marrëveshjen e paqes Izrael–Hamas të javës së kaluar.
Sipas të përditshmes italiane Corriere della Sera, një pjesë e pasagjerëve dëgjuan një zhurmë të fortë, ndërsa të tjerë pretenduan se panë tym që vinte nga pjesa e pasme e avionit.
Zjarrfikësit ishin në gatishmëri në momentin e uljes së avionit Airbus A321neo, i cili u ul në pistë pa incidente.
Në një deklaratë zyrtare, Wizz Air mohoi se ka pasur tym apo zjarr, duke e cilësuar ngjarjen si një “defekt teknik”.
Avioni ndodhet aktualisht nën inspektim të plotë teknik, ndërsa autoritetet italiane të aviacionit civil kanë nisur verifikimet për të përcaktuar shkakun e incidentit. /skyweb.al
