Presidenti i Polonisë ka firmosur një reformë të re tatimore që ka për qëllim të lehtësojë barrën financiare për familjet dhe të stimulojë rritjen ekonomike. Ligji i ri parashikon taksë zero mbi të ardhurat personale për të gjithë prindërit që rrisin të paktën dy fëmijë, duke përfshirë edhe kujdestarët ligjorë apo prindërit kujdestarë.
Ky lehtësim fiskal do të zbatohet për të ardhurat vjetore deri në 140 mijë zloty (rreth 32,973 euro) dhe pritet të rrisë në mesatarje me 1,000 zloty (rreth 235 euro) buxhetin mujor të një familjeje.
Projektligji u prezantua në gusht nga Presidenti Karol Nawrocki, i cili e kishte përfshirë këtë masë si një nga premtimet kryesore të fushatës së tij në programin “Kontrata me Polakët”. Ai nënshkroi ligjin më 8 gusht dhe më pas e dërgoi në Sejm për miratim. Reforma hyn në fuqi menjëherë, por efektet financiare për qytetarët do të ndihen në deklaratat tatimore të vitit 2026, të cilat do të dorëzohen në 2027.
Kjo masë është pjesë e paketës më të gjerë të reformave të quajtura “Armatimi Tatimor”, që përfshin gjithashtu uljen e TVSH-së nga 23% në 22%, heqjen e taksës mbi fitimet kapitale dhe indeksimin automatik të pensioneve.
Qeveria polake synon me këtë paketë të rrisë konsumimin, të përmirësojë standardin e jetesës për familjet dhe të nxisë pjesëmarrjen në tregun e punës, duke u përballur me sfidat demografike të vendit. /Skyweb.al
