Në kryeqytetin e Letonisë, Riga, shenjat e gjelbra me mbishkrimin “Patvertne”, që do të thotë strehë janë shfaqur në dhjetëra ndërtesa publike. Ato tregojnë vendndodhjen e strehimeve emergjente, ndërsa autoritetet vendase po intensifikojnë përgatitjet për një krizë të mundshme sigurie.
Rritja e tensioneve në kufijtë lindorë të NATO-s ka shtuar frikën për një përshkallëzim të mëtejshëm nga Rusia, veçanërisht pas incidenteve me dronë dhe shkeljeve të hapësirës ajrore në disa vende europiane.
Ministri i Mbrojtjes së Letonisë, Andris Spruds, ka deklaruar se vendi tashmë është më i përgatitur se kurrë, duke ndërtuar qëndrueshmëri përballë çdo kërcënimi. Në një konferencë ndërkombëtare të mbajtur në Riga, përfaqësues amerikanë paralajmëruan se konflikti i ardhshëm mund të nisë jo me tanke, por me sulme kibernetike, duke goditur infrastrukturën kritike si aeroportet apo rrjetet energjetike.
Edhe ish-kreu i komitetit ushtarak të NATO-s, admirali Rob Bauer, theksoi natyrën e re të luftës moderne, ku mbështetja ajrore dhe detare luajnë rol vendimtar.
Letonia, ndërkohë, ka marrë masa konkrete: rindërtim të strehimeve civile, rritje të buxhetit të mbrojtjes me 85 milionë euro, grumbullim të furnizimeve emergjente dhe ndërtim gardhesh mbrojtëse përgjatë kufirit me Rusinë. Vendimi për t’u shkëputur nga rrjeti energjetik i përbashkët me Moskën ka qenë gjithashtu pjesë e strategjisë për pavarësi dhe siguri.
Ish-nënkryetarja e bashkisë së Rigës, Linda Ozola, është e prerë: “E dimë që kemi një fqinj të rrezikshëm. Por këtë herë, Riga është gati.” /Skyweb.al
