Një kirurg që vendosi mikroçipa në pesë pacientë në Spitalin e Syve Moorfields në Londër thotë se rezultatet e provës janë “mahnitëse”.
Sheila Irvine, 70 vjeç, e regjistruar si e verbër, i tha BBC-së se ishte “jashtë kësaj bote” dhe mund të lexonte dhe të zgjidhte sërish fjalëkryqe. “Është e mrekullueshme, e bukur. Më jep kaq shumë kënaqësi,” tha ajo.
Kjo teknologji ofron shpresë për njerëzit që vuajnë nga një formë e avancuar e problemit me shikimin të lidhur me moshën (AMD), e quajtur atrofia gjeografike (GA), që prek më shumë se 250,000 njerëz në Mbretërinë e Bashkuar dhe pesë milionë në mbarë botën. Tek personat me këtë sëmundje, e cila është më e zakonshme tek të moshuarit qelizat në një zonë shumë të vogël të retinës në pjesën e pasme të syrit dëmtohen gradualisht dhe vdesin, duke çuar në turbullim ose shtrembërim të shikimit qendror. Ngjyrat dhe detajet e imta humbasin shpesh.
Procedura e re përfshin vendosjen e një mikroçipi fotovoltaik shumë të vogël, vetëm 2mm katror, me trashësinë e një qimeje floku, nën retinë.
Pacientët më pas vendosin syze me një kamerë video të integruar. Kamera dërgon një rreze infra të kuqe të imazheve video drejt implantit në pjesën e pasme të syrit, i cili i dërgon ato më pas në një procesor të vogël që mbahet në xhep për t’i përmirësuar dhe qartësuar ato.
Më pas, imazhet dërgohen në tru përmes implantit dhe nervit optik, duke u dhënë pacientëve një farë shikimi sërish.
Pacientëve iu deshën muaj të tërë për të mësuar se si të interpretonin imazhet. Mahi Muqit, kirurg okulistik në Spitalin e Syve Moorfields në Londër, i cili drejtoi pjesën britanike të provës, i tha BBC-së se ishte “një teknologji novatore dhe që ndryshon jetën”.
“Kjo është implanti i parë që ka treguar se u jep pacientëve një shikim domethënës që ata mund ta përdorin në jetën e përditshme, si për të lexuar apo shkruar. /Skyweb.al
