Denise Bacon, 65 vjeçe nga Crowborough, Angli, arriti të luante në klarinetë gjatë një operacioni për stimulim të thellë të trurit (DBS), në spitalin King’s College Hospital.
Ajo vuante nga Parkinsoni që nga viti 2014, që i kishte ndikuar rëndë në aftësitë e saj për të lëvizur dhe për të luajtur muzikë. Gjatë ndërhyrjes kirurgjikale që zgjati katër orë, ndërsa pacientja ishte e zgjuar, mjekët vunë re përmirësim të menjëhershëm të lëvizjeve të gishtërinjve të saj sapo nisi stimulimi elektrik.
“Menjëherë ndjeva dorën e djathtë që lëvizte më lehtë, dhe kjo më ndihmoi të luaj klarinetën pa vështirësi – isha shumë e lumtur,” tha Bacon.
Mjekët shpresojnë që përmirësimi të ndikojë gjithashtu në aftësinë e saj për të ecur, notuar dhe kërcyer. Prof. Keyoumars Ashkan, që kreu operacionin, tha se elektrodat u vendosën me saktësi të lartë, duke përdorur një sistem navigimi të veçantë.
Stimulimi i thellë i trurit është një procedurë që mund të sjellë përmirësime të ndjeshme për disa pacientë me sëmundje neurologjike si Parkinsoni. /Skyweb.al
