Fshati Varenna, një nga destinacionet më të vizituara në brigjet e Liqenit Como në Itali, ka vendosur rregulla të reja për turistët.
Autoritetet lokale kanë ndaluar ecjen në rrugët e fshatit pa bluzë ose vetëm me rroba banje.
Sipas rregullores së re, veshje të tilla do të lejohen vetëm në plazhet buzë liqenit ose gjatë udhëtimeve me varkë.
Turistët që shëtisin në qendër të fshatit me kraharor të zbuluar apo me rroba banje rrezikojnë gjoba nga 50 deri në 200 euro.
Vendimi është marrë për të frenuar sjelljet e papërshtatshme dhe për të menaxhuar më mirë fluksin e lartë të vizitorëve.
Varenna ka rreth 650 banorë të përhershëm, por çdo vit pret qindra mijëra turistë.
Autoritetet kanë vendosur edhe kufizime për grupet turistike, të cilat nuk do të mund të kenë më shumë se 25 persona.
Po ashtu, guidave u ndalohet përdorimi i altoparlantëve në rrugët e ngushta me kalldrëm.
Kryebashkiaku Mauro Manzoni tha se Varenna është krenare që mirëpret turistë nga e gjithë bota, por theksoi se jeta e banorëve nuk mund të sakrifikohet për turizmin masiv.
Masat janë mbështetur edhe nga bizneset lokale.
Pronarët e dyqaneve dhe restoranteve thonë se turistët mund të qëndrojnë me rroba banje në plazh, por jo kur hyjnë në lokale, kisha, dyqane apo shëtisin në sheshet publike.
Varenna nuk është i vetmi destinacion italian që ka vendosur rregulla të tilla.
Më herët, Sorrento vendosi gjoba për turistët që shëtisin me rroba banje në qytet, ndërsa Portofino ndaloi ndalesat e gjata për selfie në disa zona, për të shmangur bllokimin e rrugëve nga vizitorët. /skyweb.al
