Vezët prej vitesh ndajnë ekspertët dhe konsumatorët: disa i vlerësojnë për vlerat ushqyese, të tjerë i lidhin me rritjen e kolesterolit.
Por një eksperiment i pazakontë ka rikthyer debatin mbi ndikimin real të vezëve në shëndet.
Nick Norwitz, doktorant në Universitetin e Harvardit, vendosi të konsumojë 720 vezë brenda një muaji.
Ai hëngri mesatarisht 24 vezë në ditë, për të parë se çfarë do të ndodhte me nivelin e kolesterolit në gjak.
Çdo vezë përmban rreth 186 mg kolesterol, që do të thotë se gjatë eksperimentit ai mori mbi 133 mijë mg kolesterol nga ushqimi.
Pritshmëria e shumë njerëzve ishte që kolesteroli “i keq”, LDL, të rritej ndjeshëm. Por rezultati ishte i kundërt: LDL-ja e tij ra me 18%.
Norwitz tha se kishte parashikuar që konsumimi i 720 vezëve nuk do t’ia rriste kolesterolin LDL dhe kjo, sipas tij, u konfirmua.
Në mes të eksperimentit, ai shtoi edhe rreth 60 gramë karbohidrate në ditë, kryesisht nga fruta si banane, boronica dhe qershi.
Ai shpjegoi se shtimi i karbohidrateve mund të ketë ndikuar në uljen e LDL-së, sidomos te personat që ndjekin dieta me pak karbohidrate.
Studiuesit thonë se lidhja mes kolesterolit që marrim nga ushqimi dhe kolesterolit në gjak është më e ndërlikuar nga sa mendohej më parë.
Megjithatë, eksperimenti nuk do të thotë se të gjithë mund të kenë të njëjtin rezultat.
Ekspertët këshillojnë që ndryshime të tilla ekstreme në dietë të mos bëhen pa këshillën e mjekut apo nutricionistit.
